د ننګرهار پوهنتون محصلینو ته (د مدني او جزايي دعواوو په اثبات کې د عدلي طب رول) تر عنوان لاندې روزنیز او معلوماتي سيمینار وړاندې شو.
د ننګرهار پوهنتون شرعیاتو پوهنځي فقې او قانون او حقوقو او سیاسي علومو پوهنځي قضاء او څارنوالۍ څانګو محصلینو ته د دې پوهنتون طب پوهنځي استاد پوهنوال احمد شکیب زلمي له خوا د مدني او جزايي دعواوو په اثبات کې د عدلي طب رول په هکله روزنیز او معلوماتي سیمینار وړاندې شو.
د سيمینار پر مهال د عدلي طب ارزښت او عملي رول په تفصیلي ډول تشریح شو او محصلینو ته څرګنده شوه، چې عدلي طب د حقوقي قضیو په حل او حقیقت موندلو کې اساسي ونډه لري او د یادې پروسې په ترسراوي سره د پېښو او جرمونو څرنګوالی روښانه کېږي.
د سيمینار وړاندې کوونکي استاد د موضوع په تشریح کې د عدلي طب پېژندنې، د عدلي طب په واسطه د دعواوو د اثبات تکتیکونو، د قتل او طبیعي مړینې توپیرونو، نسب تثبیت، ضرب او جرحه، د پېښې صحنې ارزونې، د عدلي راپورونو اهمیت او نورو مواردو په اړه تفصیلي معلومات وړاندې کړل.
په پای کې محصلینو پوښتنې وکړې او استاد له خوا ورته ځوابونه ورکړل شول.
سرچینه: د اطلاعاتو، نشراتو او عامه اړیکو امریت
