د ننګرهار پوهنتون له خوا د ټولنیزو علومو په برخه کې نوي پرانیستل شوي نړیوال ژورنال (NUSSJ) د نړیوال معیار سریال نمبر ترلاسه کړ.

د نړیوال معیار سریال نمبر یا (International Standard Serial Number) یوه نړیواله او معیاري وسیله ده، چې د علمي مجلو او خپرونو په ارزښت، اهمیت، ترتیب، پېژندنه، معیاریتوب او لاسرسي کې مهم رول لري. 
د پوهنتون د مسؤلینو په وینا، د ټولنیزو علومو په برخه کې د ننګرهار پوهنتون له خوا نوي ایجاد شوي ژورنال تر دې وړاندې د ( DOI ،Cross ref او ګوګل سکالر) ادارو نمبر او غړیتوب ترلاسه کړي وو.
د ننګرهار پوهنتون د علمي چارو مرستیال پوهندوی مولوي احسان الله ناصح یاده چاره د پوهنتون او لوړو زده کړو سرتاسري کورنۍ لپاره ستره بریا او لاسته راوړنه وبلله او له کبله یې ټولو څېړونکو او استادانو ته مبارکي وویله.
څېړونکي او استادان کولی شي، د ۲۰۲۵ کال فبرورۍ میاشت تر۲۰ مې نېټې پورې د ټولنیزو علومو په برخه کې خپلې علمي او څېړنیزې مقالې په ویب سایټ کې د ذکر شوي ایمیل ادرس له لارې په یاد ژورنال کې د نشر په موخه راولېږي.
د یادونې وړ ده، چې ننګرهار پوهنتون د ټولنیزو علومو نړیوال ژورنال سربېره د بایو ساینس په برخه کې هم (NUIJB) نړیوال ژورنال لري، چې په معیار پوره علمي او څېړنیزې مقالې نشروي.