د ننګرهار پوهنتون فرهنګي کمېټې ددې پوهنتون د محصلانو چارو مرستیال پوهنوال سید اکرم هاشمي په مشرۍ غونډه وکړه.
نوموړې غونډه، چې د محصلانو خدمتونو د انسجام په امریت کې جوړه شوې وه، په پیل کې د پوهنتون د محصلانو چارو مرستیال پوهنوال سید اکرم هاشمي او د فرهنګي کمېټې مشر پوهنیار مبارز ځیرمن خبرې وکړې او هم یې د پوهنځیو له استازو د تېرو کړنو او فعالیتونو راپور واورېد.
د مجلس په دویمه برخه کې د کمېټې د غړو له خوا په یو شمېر موضوعاتو بحث وشو، چې د پوهنځیو له خوا د نویو راغلو محصلینو لپاره د ښه راغلاست غونډو نیول، چې په ترڅ کې یې د پوهنتون او اړوند پوهنځي په اړه معلومات او همدارنګه د کریډیټ، نظم او دسپیلن، لیلیې او نورو لوایحو او مقرراتو په اړه محصلینو ته معلومات ورکړل شي؛ د تېر سمستر د ممتازو محصلینو ستایل، د چاپېریال ساتنې کمېټې سره په همغږۍ د پوهنځیو په کچه د پاککارۍ کمپاینونه ترسره کول او ځینې نور موضوعات په کې شامل وو، چې له بحث وروسته یې په اړه پرېکړې وشوې.
د مجلس په وروستۍ برخه کې د محصلانو چارو د مرستیال او د کمېټې د غړو له خوا د ښوونې او روزنې پوهنځي استاد او د فرهنګي کمېتې مسؤل پوهنمل شفیق الله رحماني ته د پوهنځي په کچه د ښو کړنو او فعالیتونو په اساس د غوره مقام اخیستلو مبارکي وویله.
