د ننګرهار پوهنتون علمي شورا نوبتي غونډه وکړه.
د ننګرهار پوهنتون علمي شورا ددې پوهنتون د رئيس پوهاند دوکتور خليل احمد بهسودوال په مشرۍ نوبتي غونډه وکړه.
په نوموړي کاري ناسته کې، چې د افغانستان د اسلامي امارت د لوړو زده کړو عالي کمېسون فوق العاده استازي، د ننګرهار پوهنتون د علمي چارو، محصلانو چارو، اداري او مالي چارو مرستیالانو، د بېلابېلو پوهنځيو او تدریسي روغتون رئيسانو او استادانو په کې برخه لرله، د پوهنتون د علمي ترفیعاتو کیسونو او يو شمېر نورو مسايلو په اړه بحث او پرېکړې وشوې.
د ننګرهار پوهنتون رئيس پوهاند دوکتور خليل احمد بهسودوال د مجلس د پرانیستې پر مهال د شورا غړو ته د ژبو او ادبیاتو پوهنځي عربي څانګې د ماسترۍ پروګرام د ایجاد مبارکي وویله او هغه یې د پوهنتون لپاره ستره علمي لاسته راوړنه وبلله.
نوموړي وویل: د پوهنتون اداره هڅه کوي، چې د فوق لیسانس برنامې نورو پوهنځیو ته وغځوي، چې په دې لړ کې به ډېر ژر د کرنې په پوهنځي کې هم د ماسترۍ پروګرام رامنځته شي.
پوهاند بهسودوال د پوهنتون د درسونو د پیل لپاره د چمتووالی، د حاضریو کنترول او د چاپېریال د پاکۍ په اړه مسؤلینو ته اړینې سپارښتنې وکړې.
د علمي چارو مرستیال پوهندوی دوکتور محمد حامد کډوال د تضمین کیفیت پروسې پر دوام، د فوق لیسانس برنامو ارزونې او د انلاین کورسونو د ثبت پر پروسې ټینګار وکړ او د پوهنځیو له مسؤلینو یې د یادو چارو د راپورونو غوښتنه وکړه.
د ننګرهار ولایت لپاره د افغانستان د اسلامي امارت د لوړو زده کړو عالي کمېسون فوق العاده استازي قاضي خالد صداقت د خپلو تېرو کړنو ګزارش د شورا غړو ته وړاندې کړ.
نوموړي وویل: د پوهنتونونو او استادانو د امنیت موضوع د امنیتي مسؤلینو سره شریکول، د خصوصي پوهنتونونو او موسساتو د څارنې او ارزونې لپاره د کاري کمېټو جوړول، د یادو پوهنتونونو د فیسونو کمولو موضوع، چې په بدل کې به یې د لوړو زده کړو وزارت پرې مالیه کموي، د لیلیو د وضعیت ارزونه او د ستونزو د حل لپاره د اړینو تدابیرو نیول، د پوهنتون د قراردادونو بررسي، د سولې مرکز او نورو مرستندوی بنسټونو سره کاري ناستې او نور هغه څه دي، چې په تېره یوه میاشت کې ترسره شوي.
د مجلس په وروستۍ برخه کې د ننګرهار پوهنتون سربېره د کونړ سید جمال الدین افغاني او لغمان پوهنتونونو د علمي ترفیعاتو ۱۵ او د رتبې تثبیت ۱ کیسونو او د ځینو نورو متفرقه مسايلو په اړه بحث او پرېکړې وشوې.
