د ننګرهار پوهنتون علمي شورا ددې پوهنتون د رئيس پوهاند دوکتور خليل احمد بهسودوال په مشرۍ غونډه وکړه.
په نوموړي کاري ناسته کې، چې د کب په ۲۵مه په ریاست مقام کې ترسره شوه او د پوهنتون مرستیالانو، د بېلابېلو پوهنځيو او تدریسي روغتون رئيسانو او استادانو په کې برخه لرله، د پوهنتون د علمي او تدریسي چارو، علمي ترفیعاتو، تقرر او انفکاک کیسونو او يو شمېر نورو مسايلو په اړه بحث او پرېکړې وشوې.
د ننګرهار پوهنتون رئيس پوهاند دوکتور خليل احمد بهسودوال د مجلس د پرانیستې پر مهال په تېره یوه میاشت کې د پوهنتون ادارې د کړنو او لاسته راوړنو په اړه د شورا غړو ته معلومات ورکړل او همدارنګه یې د نهايي سمستر د درسونو او ازموینو د موفقانه ترسراوي په پار د پوهنځیو د رئیسانو، استادانو او د ازموینو کمېټې د مسؤلینو څخه مننه وکړه.
نوموړي دغه راز د پوهنځیو مسؤلینو ته د نوي سمستر د درسي بهیر د پیل لپاره، چې د وري په ۲مه به پیل شي، د اړین چمتووالي لارښوونه وکړه.
د لوړو زده کړو وزارت فوق العاده استازی او د ننګرهار پوهنتون د اداري او مالي چارو مرستیال قاضي خالد صداقت، د علمي چارو مرستیال پوهنمل احسان الله ناصح او د محصلانو چارو مرستیال پوهنوال سید اکرم هاشمي په خپلو خبرو کې د کلنۍ بیاکتنې په موخه د پوهنځیو د شوراګانو او کمېټو د کړنو او ارزونو د راپورونو لېږلو، د درسي پلانونو او مهالوېش جوړولو، په خپل وخت د فارغانو د جدولونو ترتیبولو او د محصلینو له خوا د پوهنځیو او لیلیو د نظم او دسپلین د رعایتولو په اړه د مجلس ګډونوالو ته اړینې سپارښتنې وکړې.
ورپسې د پوهنتون تدریسي روغتون رئیس پوهنوال ډاکتر همایون چهاردیوال د روغتون د کړنو او لاسته راوړنو په اړه معلوماتي پریزنټیشن وړاندې کړ، چې د شورا د غړو له خوا مثبت ارزیابي شو.
د مجلس په وروستۍ برخه کې د ننګرهار او لغمان پوهنتونونو د علمي ترفیعاتو، تقرر او انفکاک د ۱۵ کیسونو او ځینو نورو متفرقه مسايلو په اړه بحث او لازمې پرېکړې وشوې.
