د ننګرهار پوهنتون علمي شورا ددې پوهنتون د رئيس پوهاند دوکتور خليل احمد بهسودوال په مشرۍ غونډه وکړه.
په نوموړي کاري مجلس کې، چې د پوهنتون د علمي چارو مرستيال پوهندوى دوکتور محمد حامد کډوال، د محصلانو چارو مرستيال پوهنوال سيد اکرم هاشمي، د اداري او مالي چارو مرستیال مسعود پیروزي، د بېلابېلو پوهنځيو او تدریسي روغتون رئيسانو او استادانو په کې برخه لرله، د پوهنتون د علمي، اداري، تقرر او ترفیعاتو، د محصلینو د عرایضو او يو شمېر نورو مسايلو په اړه بحث او پرېکړې وشوې.
د ننګرهار پوهنتون رئيس پوهاند دوکتور خليل احمد بهسودوال د مجلس د پرانیستې پر مهال د کانکور ازموینې د بریالۍ اخیستنې، د کرونا ناروغۍ په اړه د احتیاطي تدابیرو نیولو، د کرنې په پوهنځي کې د شیشه یي شنې خونې یا ګلاس هاوس جوړېدلو او د دویم سمستر د پیل لپاره د اړین چمتووالي په اړه د مجلس له ګډونوالو سره معلومات شریک کړل او هم یې ورته اړینې سپارښتنې وکړې.
د محصلانو چارو مرستیال پوهنوال سید اکرم هاشمي د ازموینو کمېټې راپور او د پوهنتون د کریکولم کمېټې مشر پوهنمل هجرت الله صافي د کریکولم د تطبیق په اړه ترتیب کړی پریزنټیشن د شورا له غړو سره شریک کړ.
د مجلس په وروستۍ برخه کې د ننګرهار پوهنتون سربېره د کونړ سید جمال الدین افغاني، لغمان، نورستان او هلمند پوهنتونونو او لوړو زده کړو موسسو د علمي ترفیعاتو ۱۷، د تقرر ۵، ارتقاء ۱ او د رتبې تثبیت ۴ کیسونو، د ژبو او ادبیاتو پوهنځي عربي څانګه کې د شپې پروګرام ایجاد او د يو شمېر نورو متفرقه مسايلو په اړه بحث او پرېکړې وشوې.
