د ننګرهار پوهنتون علمي شورا ددې پوهنتون د رئيس پوهاند دوکتور خليل احمد بهسودوال په مشرۍ غونډه وکړه
په نوموړي مجلس کې، چې د پوهنتون د علمي چارو مرستيال پوهندوى دوکتور محمد حامد کډوال، د محصلانو چارو مرستيال پوهندوى سيد اکرم هاشمي، د بېلابېلو پوهنځيو او تدريسي روغتون رئيسانو او استادانو په کې برخه لرله، د پوهنتون د علمي، تدریسي، تقرر او ترفیعاتو، د محصلینو د عرایضو او يو شمېر نورو مسايلو په اړه بحث او خبرې اترې وشوې.
د ننګرهار پوهنتون رئيس پوهاند دوکتور خليل احمد بهسودوال د مجلس د پرانیستې پر مهال د تېر سمستر په علمي او تدریسي بهیر رڼا واچوله او د نوي سمستر د پیل په اړه یې مسؤلینو ته اړینې لارښوونې وکړې.
د شورا اجنډا د علمي چارو مرستیال پوهندوی دوکتور محمد حامد کډوال د مجلس له غړو سره شريکه کړه، چې د علمي ترفیعاتو ۲ کیسونه، د انجنیري پوهنځي د ۵ تنو قراردادي استادانو تقرر، ننګرهار پوهنتون کې د نړیوالې علمي مجلې رامنځته کول، د نوي سمستر د پیل لپاره چمتووالی او يو شمېر نور متفرقه مسايل هغه موضوعات وو، چې په اړه یې بحث او پرېکړې وشوې.
د مجلس په پای کې د تېرو ازموینو راپور د ازموینو کمېټې د غړي پوهنیار شاپور کوشککي له خوا وړاندې شو، چې په کې د ازموینو د مثبتو او منفي اړخونو، ستونزو او ننګونو او د هغې د حل لارو چارو ته اشاره شوې وه.
