د ننګرهار پوهنتون طب پوهنځي ددې پوهنتون مرکزي کتابتون سره د (۶۲۱) ټوکه کتابونو مرسته وکړه.
یاد کتابونه، چې د طب پوهنځي د ۸۳ تنو استادانو او علمي کادر غړو بېلابېل تالیفي اثار دي، د پوهنځي مسؤلینو د پوهنتون څېړنو او علمي مجلو مرستیال په حضور کې اړوندې مرجع ته وسپارل.
په همدې موخه جوړه شوې ناسته کې د ننګرهار پوهنتون د طب پوهنځي رئیس پوهنوال ډاکتر محمد عظیم عظیمي یاد کتابونه د طب پوهنځي د استادانو د کلونو اکاډمیکو هڅو او څېړنو پایله وبلله او زیاته یې کړه، چې یاد تالیفي اثار به د استادانو او محصلینو څېړنیز، تدریسي او زده کړه ییز بهیر لا پیاوړی کړي.
نوموړي ژمنه وکړه، چې د طب پوهنځي استادان به په راتلونکي کې هم د علمي اثارو د تالیف او چاپ په برخه کې خپلې هلې ځلې او کوښښونه جاري وساتي.
د ننګرهار پوهنتون د څېړنو او علمي مجلو مرستیال پوهندوی دوکتور سعید محمد وقار د پوهنتون د مرکزي کتابتون غني کولو په موخه د طب پوهنځي د یادې مرستې له کبله مننه وکړه.
نوموړي وویل: یاد کتابونه نه یوازې دا چې د استادانو او محصلینو د څېړنو او مطالعې لپاره اړین او ګټور دي، بلکې د پوهنتون څېړنیز او اکاډمیک حیثیت پیاوړتیا په برخه کې هم مهم ګام دی.
مرسته شوي کتابونه د ننګرهار پوهنتون څېړنو معاونیت او طب پوهنځي مسؤلینو له خوا د کتابتون امریت ته وسپارل شول، چې د محصلینو او استادانو مطالعې او لاسرسي لپاره په کتابتون کې کېښودل شي.
