د ننګرهار پوهنتون ساینس پوهنځي د جيولوجي او کانونو اکتشاف انجنيري څانګې ۸۰ تنو محصلینو ته د عملي زده کړو زمینه برابرېږي.
په یاد شمېر کې محصلین به په اوو دورو کې په جلال اباد ښار کې د منډول په نوم د قیمتي کاڼو د پروسس شرکت له خوا د شپږو میاشتو په موده کې وروزل شي.
یاده خبره د منډول د قیمتي کاڼو د پروسس شرکت اداري مسؤل اکرام الله شینواري د ننګرهار پوهنتون رئيس پوهاند دوکتور خليل احمد بهسودوال سره د لیدنې پر مهال وکړه.
نوموړي وویل: د محصلینو او ځوانانو د عملي زده کړو لپاره په معیاري وسایلو سمبال مجهز مرکز لري، چې د تدریس چارې یې د بهرنیو استادانو له خوا پر مخ وړل کېږي.
نوموړي د عملي زده کړو سربېره په خپلو لابراتوارونو کې د جيولوجي او کانونو اکتشاف انجنيري څانګې د استادانو او محصلینو له خوا د قیمتي کاڼو د څېړنو د ترسراوي په برخه کې هم د همکارۍ ژمنه وکړه.
د ننګرهار پوهنتون رئیس پوهاند دوکتور خلیل احمد بهسودوال د منډول د قیمتي کاڼو د پروسس شرکت له مسؤلینو مننه وکړه او د محصلانو چارو مرستیال او د ساینس پوهنځي رئیس ته یې سپارښتنه وکړه، چې د محصلینو په ورپېژندلو کې له نوموړې ادارې سره مرسته وکړي.
د یادونې وړ ده، چې په نوموړې ناسته کې د محصلانو چارو مرستيال پوهنوال سيد اکرم هاشمي، د ساینس پوهنځي رئیس پوهندوی صفت الله شاکر او د پوهنتون د بهرنیو اړیکو کمېټې مشر پوهنمل دوکتور محمد دوست صافي هم حضور درلود.