د ننګرهار پوهنتون رهبرۍ غړو د تدریسي روغتون له روانو فعالیتونو څخه نظارت وکړ.
د ننګرهار پوهنتون رئیس د علمي چارو او محصلانو چارو مرستیالانو په ملتیا د ننګرهار پوهنتون تدریسي روغتون د روانو اداري چارو، محصلینو عملي روزنیز بهیر او روغتیایي خدمتونو څخه د نږدې لیدنه وکړه او د لا مؤثروالي لپاره یې د روغتون مسؤلینو ته اړینې لارښوونې او سپارښتنې وکړې.
په همدې پار د ننګرهار پوهنتون د مشرتابه غړو او تدریسي روغتون د مسؤلینو، څانګو آمرینو او استادانو تر منځ د روغتون د غونډو په تالار کې ناسته وشوه.
د ننګرهار پوهنتون رئیس شیخ انعام الله مدني د خپلې وینا پر مهال د تدریسي روغتون په اهمیت او په کې د چارو څرنګو الي په هکله خبرې وکړې او د یاد مهم ارګان په چارو کې ناغېړي کول یې ستر غفلت وباله.
نوموړي په روغتون کې د روانو چارو په تنظیم او انسجام ټینګار وکړ او د یاد روغتون مسؤلینو او کارکوونکو ته یې په چارو کې د همغږي اوسېدو، اطاعت، دندې ته پر وخت راتللو، محصلینو او ناروغانو سره غوره برخورد او د اصولو مطابق د چارو ترسراوي سپارښتنې وکړې.
د پوهنتون رئیس د روغتون د ټول ټیم هڅې وستایلې او ډاډ یې ورکړ، چې د پوهنتون اداره به هغوی ته د ښو خدماتو وړاندې کولو لپاره د اړینو وسایلو او سرچینو برابرولو په هدف خپلې هڅې جاري وساتي.
د ننګرهار پوهنتون د علمي چارو مرستیال پوهندوی مولوي احسان الله ناصح او د محصلانو چارو مرستیال پوهنیار حافظ سید محمد قاسم هاشمي په خپلو خبرو کې عملي زده کړې د نظري زده کړو تکمیلي برخه وبلله او د ټاکلو معیارونو سره سم د تخصص برنامو مخ ته وړلو، مسلکي پرمختګ ته زیاتې پاملرنې او د محصلینو عملي زده کړو کیفیت لوړاوي باندې یې ټینګار وکړ.
د ننګرهار پوهنتون تدریسي روغتون رئیس پوهنوال ډاکتر همایون چهاردیوال د پوهنتون مشرتابه څخه مننه وکړه، چې د روغتون څخه یې لیدنه وکړه او د خپلو وړاندیزونو شریکولو سربېره یې هغوی ته ډاډ ورکړ، چې د سپارښتنو په تعقیب به یې جدي اقدامات ترسره کړي.
