د ننګرهار پوهنتون رهبرۍ د ساینس او طب پوهنځيو د جدیدالشمول محصلینو په ښه راغلاست غونډو کې ګډون وکړ.
د ننګرهار پوهنتون رئیس، د اداري او مالي چارو او محصلانو چارو مرستیالانو د ساینس او طب پوهنځیو نویو راغلو محصلینو ته د ښه راغلاست په موخه جوړو شویو غونډو کې ګډون وکړ او یادو محصلانو ته یې د هرکلي تر څنګ لازمې لارښوونې او سپارښتنې وکړې.
د ننګرهار پوهنتون رئیس شیخ انعام الله مدني، د اداري او مالي چارو مرستیال پوهنیار قاضي خالد صداقت او د محصلانو چارو مرستیال پوهنیار حافظ سید محمد قاسم هاشمي یادو غونډو کې د خپلو ویناوو پر مهال نویو راغلو محصلینو ته د ښه راغلاست ویلو تر څنګ هغوی نېکمرغه وبلل، چې د هېواد په کچه د لوړ اعتبار درلودونکي اکاډمیک مرکز (ننګرهار پوهنتون) ته، چې د پیاوړو مسلکي کادرونو د روزنې په برخه کې اوږده مخینه لري، بریالي شوي دي.
نوموړو وویل: د ننګرهار پوهنتون چاپېریال کاملاً اکاډمیک دی او د هر ډول قومي، ژبني او سمتي توپیر پرته له محصلینو سره د اسلامي شریعت په رڼا کې قانوني او اصولي چلند کېږي.
د پوهنتون رهبرۍ غړو نوي راغلي محصلین خپلو مسؤلیتونو ته ځیر کړل او ترې ویې غوښتل، چې د نورو بې ځايه بوختياوو پر ځاى خپل وخت په تدريس، مطالعې او څېړنو تېر کړي.
د طب پوهنځي رئیس پوهنوال محمد عظیم عظيمي او د ساینس پوهنځي رئیس پوهنمل رفیع الله رفیع یادو غونډو ته په خپلو خبرو کې نویو راغلو محصلینو سره د معیاري مسلکي روزنې او ورته د لازمو سهولتونو برابرولو ژمنې وکړې او هغوی یې نظم او دسپلین مراعتولو ته راوبلل.
د غونډو په پای کې جدید الشمول محصلینو ته د یادو پوهنځيو له لوري د پوهاوي په موخه د پوهنتون، پوهنځي پېژندنې، کریکولم، چاپېریال ساتنې او نورو لازمو موضوعاتو اړوند معلوماتي پرېزنټېشنونه وړاندې شول.
