د ننګرهار پوهنتون رئيس د شپې پوهنځيو پروګرام مسؤلينو سره غونډه وکړه
د ننګرهار پوهنتون رئيس پوهاند دوکتور خلیل احمد بهسودوال د محصلانو چارو مرستيال او د شپې برنامو آمر پوهندوى سيد اکرم هاشمي په ملتیا د دې پوهنتون د شپې پوهنځيو پروګرام مسؤلينو سره غونډه وکړه.
د غونډې پر مهال د شپې پروګرام مسؤلينو د خپلو فعاليتونو، لاسته راوړنو او ستونزو په اړه د پوهنتون مشرتابه ته معلومات ورکړل.
د ننګرهار پوهنتون رئيس د شپې پوهنځيو پروګرام د کيفيت ښه والي په موخه مسؤلينو ته لازمې سپارښتنې وکړې او د ستونزو د حل ژمنه يې وکړه.
پوهاند بهسودوال د پوهنتون نورو پوهنځیو ته د یاد پروګرام د غځولو او همدارنګه د شپې پوهنځیو د فیسونو د پنځوس سلنه تخفیف په اړه هم مسؤلینو ته معلومات ورکړل، چې په وینا یې، د شپې پوهنځیو د پراختیا او د محصلینو لپاره ښه زیری دی.
د يادونې وړ ده، چې ننګرهار پوهنتون د ښوونې او روزنې، شرعياتو، ژبو او ادبياتو، حقوقو او سياسي علومو او اقتصاد پوهنځيو کې د شپې پوهنځيو پروګرام لري، چې دم ګړۍ پکې نږدې دوه زره تنه محصلان په زده کړو بوخت دي.
