د ننګرهار پوهنتون د پلان او پالیسۍ کمېټې غړو د دې پوهنتون له مشرتابه سره غونډه وکړه.
په یاده ناسته کې، چې د ننګرهار پوهنتون رئیس، د علمي چارو مرستیال او د پلان او پالیسۍ کمېټې غړو په کې حضور درلود، د پوهنتون د نوي ستراتیژیک پلان د لومړۍ ربعې د تطبیق ارزونې، د پوهنځیو په کچه د جوړو شویو کمېټو د چارو د څارنې، د پوهنتون اوسني عمومي وضعیت او ټاکل شویو موخو ته د رسېدو د څرنګوالي په هکله بحث او خبرې وشوې.
د مجلس د پرانیستې وینا پر مهال د ننګرهار پوهنتون رئیس شـــیـــ/ـــخ انعام الله مدني د پلان په ارزښت او اهمیت خبرې وکړې او ستراتیژیک پلان او د هغې سم تطبیق یې د یوې ادارې د پرمختګ او موخو ته د رسېدو په برخه کې اساس وباله.
نوموړي د پوهنتون په لوړتیا او پرمختګ کې د پلان او پالیسۍ کمېټې د غړو ترسره کړې چارې او غوره پلان جوړونې په برخه کې د هغوی ژمنتیا وستایله او سپارښتنه یې وکړه، چې راتلونکي کې هم د پوهنتون لومړیتوبونو او لنډمهاله او اوږدمهاله موخو ترلاسه کولو لپاره د وخت د غوښتنو سره سمه پلان ګذاري وکړي.
د ننګرهار پوهنتون د علمي چارو مرستیال پوهندوی احسان الله ناصح د غونډې پر مهال په خپلو خبرو کې ټینګار وکړ، چې د جوړ شوي پلان د تطبیق په برخه کې پرتې ننګونې ژر حل، د پوهنځیو په کچه د پلان او پالیسۍ کمېټو چارې جدي تعقیب او د پلان په تطبیق کې باید بشپړه همغږي رامنځ ته شي.
نوموړي د لوړو زده کړو وزارت له لوري د ننګرهار پوهنتون د ستراتیژیک پلان د تائید او منظورېدو له کبله د کمېټې له غړو مننه وکړه.
د ننګرهار پوهنتون د پلان او پالیسۍ کمېټې مشر پوهنمل عبدالهادي زماني د خپلو خبرو پر مهال د یادې کمېټې د تېرو فعالیتونو، راتلونکو پلانونو، پرمختګونو او لاسته راوړنو په هکله معلومات وړاندې کړل او د پوهنتون مشرتابه ته یې په راتلونکي کې هم په اړونده برخه کې د همکارۍ ډاډ ورکړ.
سرچینه : د عامه اړیکو، اطلاعاتو او نشراتو امریت
