د ننګرهار پوهنتون د ټولو امریتونو خودي ارزونه ترسره شوه.

د پوهنتون د مسؤلینو په وینا، له دې ارزونې څخه یې موخه د لوړو زده کړو وزارت له لوري هغې ارزونې ته بشپړ چمتووالی نیول وو، چې د روان کال په وروستیو کې به ترسره شي.
یاده داخلي ارزونه چې د ننګرهار پوهنتون د علمي چارو معاونیت تر چتر لاندې د ټاکلو چیک لېستونو له مخې ترسره شوه، د دې پوهنتون د علمي چارو مرستیال، د تضمین کیفیت داخلي واحد مسؤل او اړونده برخه کې د مسؤلې کمېټې ټولو استادانو په کې برخه لرله.
د ننګرهار پوهنتون د علمي چارو مرستیال پوهنوال مولوي احسان الله ناصح وویل، له ارزونې پرته د نیمګړتیاوو تشخیص، د پرمختګ لپاره پلان جوړونه او د کیفیت لوړول ستونزمنه ده نو ځکه یې پوهنتون کې د شته ستونزو پېژندنې او حل لپاره یاده ارزونه ترسره کړه.
نوموړي زیاته کړه، چې د ترسره شوې ارزونې په پایله کې موندل شوې ستونزې د حل په موخو مسؤلینو سره شریکې شوي دي.