د ننګرهار پوهنتون د نوي پنځه کلن ستراتېژیک پلان جوړونې په موخه لومړنۍ کاري ناسته ترسره شوه.
په یاده غونډه کې، چې وري په ۲۹مه د پوهنتون په ریاست مقام کې جوړه شوه، د دې پوهنتون رئیس، د لوړو زده کړو وزارت فوق العاده استازي، د علمي چارو او محصلانو چارو مرستیالانو، د بېلابېلو پوهنځیو او تدریسي روغتون رئیسانو او د پوهنتون د پلان او پاليسۍ کمېټې غړو برخه لرله.
د مجلس د پرانیستې پر مهال د ننګرهار پوهنتون رئیس پوهاند دوکتور خلیل احمد بهسودوال د تېر پنځه کلن ستراتېژیک پلان د تطبیق شویو او نه تطبیق شویو مواردو او د هغې د لاملونو په اړه د مجلس ګډونوالو ته معلومات ورکړل.
نوموړي ستراتېژیک پلان د ادارې د انکشاف او موخو ته د رسېدلو مهمه لار وبلله او زیاته یې کړه، دا چې د تېر پلان موده پای ته رسېدلې، اړینه ده، چې د راتلونکو پنځو کلونو لپاره د پوهنتون نوی ستراتېژیک پلان جوړ کړو.
د لوړو زده کړو وزارت فوق العاده استازي او د ننګرهار پوهنتون د اداري او مالي چارو مرستیال قاضي خالد صداقت د پلان او پالیسۍ کمېټې غړو او د مجلس ګډونوالو ته سپارښتنه وکړه، چې د پلان جوړولو پر مهال د لوړو زده کړو وزارت ستراتېژیک پلان او همدارنګه د ټولنې عیني شرایط په پام کې ونیسي او یو داسې پلان ترتیب کړي، چې په عملي کولو یې لاسبري شو.
د غونډې په دویمه برخه کې د پوهنتون د پلان او پالېسۍ کمېټې مشر پوهنیار عبدالهادي زماني د یادې کمېټې د تېرو فعالیتونو او راتلونکو پلانونو په اړه د پوهنتون مشرتابه او د مجلس ګډونوالو ته معلومات ورکړل او هم یې د پوهنتون د ستراتېژیک پلان جوړولو په اړه د اجرااتو ډاډ ورکړ.
د مجلس په وروستۍ برخه کې ګډونوالو مسؤلینو او استادانو د ننګرهار پوهنتون د قوت او ضعف نقاطو، اسانتیاوو، فرصتونو، ستونزو او ننګونو د تحلیل په موخه ګروپي کار ترسره کړ او پایلې یې د پلان او پالیسۍ کمېټې ته وسپارلې.
