د ننګرهار پوهنتون د محصلانو چارو مرستیال د طب پوهنځي محصلینو د عملي زده کړو بهیر له نږدې وڅاره.
د ننګرهار پوهنتون د محصلانو چارو مرستیال پوهنیار حافظ سید محمد قاسم هاشمي ددې پوهنتون په تدریسي روغتون کې د طب پوهنځي محصلینو د عملي زده کړو له بهیر څارنه وکړه او همدارنګه یې د استادانو د عملي تدریس څرنګوالي په هکله معلومات ترلاسه کړل.
نوموړي د پوهنتون تدریسي روغتون مسؤلینو سره په مجلس کې د عملي زده کړو په پراختیا او پیاوړتیا ټینګار وکړ او سپارښتنه یې وکړه، چې محصلین باید په ټاکلي وخت د خپلو نظري درسونو عملي اړخونه تجربه کړي.
نوموړي محصلینو سره په کتنه کې د عملي زده کړو په اهمیت خبرې وکړې او هغوی یې وهڅول چې د ستاژ زده کړې په سمه توګه ترسره او راتلونکي کې ناروغانو ته د غوره روغتیايي خدمت ترسره کولو جوګه شي.
ښاغلي هاشمي محصلینو سره ژمنه وکړه، چې ورته به د عملي زده کړو اړوند لازم فرصتونه برابر کړي او هغوی یې د خپلو استادانو درناوي، عملي زده کړو ته پر وخت حاضرېدو او خپلو درسونو کې جدي هلو ځلو ترسراوي ته راوبلل.
