د ننګرهار پوهنتون د محصلانو چارو مرستیال ددې پوهنتون محصلینو ته د داخلي او بهرنیو ژبو زده کړې په موخه د جوړې شوې وړیا یو کلنې برنامې له تدریسي بهیر څخه لیدنه وکړه.
د ننګرهار پوهنتون د محصلانو چارو مرستیال پوهنیار حافظ سید محمد قاسم هاشمي د پوهنتون د محصلانو خدمتونو انسجام امریت مسؤلینو په ملتیا ژبو او ادبیاتو پوهنځي کې د بېلابېلو پوهنځیو محصلینو ته د پښتو، دري، عربي او انګلیسي ژبو کورسونو څخه لیدنه وکړه او په کې د روان تدریسي بهیر د څرنګوالي او محصلینو د علاقې جاج یې واخیست.
نوموړي د بېلابېلو ټولګیو محصلینو ته د خپلو ویناوو پر مهال اکاډمیکو او مسلکي موخو ته د رسېدو په برخه کې د ډېرو ژبو د زده کړې پر اهمیت خبرې وکړې، یاده وړیا برنامه یې هغوی لپاره لوی فرصت وباله او سپارښتنه یې وکړه، چې لازمه ګټه ورڅخه پورته کړي.
ښاغلي هاشمي همدارنګه د محصلانو خدمتونو انسجام امریت مسؤلینو ته ځانګړې سپارښتنه وکړه، چې د یادې برنامې د چارو ښه تنظیم او اغېزمنتیا په موخه دوامداره هلې ځلې او ښه مدیریت وکړي، چې د یاد امریت د مسؤلینو له لوري ډاډ ورکړل شو.
د یادونې وړ ده، چې د ژبو زده کړې یاده وړیا برنامه د ننګرهار پوهنتون ریاست په غوښتنه او د لوړو زده کړو وزارت په مالي ملاتړ چې د تدریسي چارې یې د ژبو او ادبیاتو پوهنځي استادان پر مخ وړي، دوه اونۍ وړاندې پیل شوه او سهار او مازدیګر محصلینو لپاره ټولګي لري.
