د ننګرهار پوهنتون د علمي چارو او محصلانو چارو مرستیالانو په دې پوهنتون کې د روانو ازموینو له بهیر څخه لیدنه وکړه.
د ننګرهار پوهنتون د علمي چارو مرستیال پوهندوی مولوي احسان الله ناصح او د ختیځ زون امارتي او خصوصي پوهنتونونو لپاره د لوړو زده کړو وزارت د دعوت او ارشاد ریاست استازي او د ننګرهار پوهنتون د محصلانو چارو مرستیال شیخ شاکر الله وحدت د پوهنتون د ازموینو مرکزي کمېټې غړو په ملتیا د اړوندو پوهنځیو د ازموینو له صحنو څخه لیدنه وکړه او په ازموینو کې د ټولو ټاکلو اصولو، نظم او دسپلین او شفافیت رعایت باندې یې ټینګار وکړ.
نوموړو استادانو ته سپارښتنه وکړه، چې ازموینې په ټاکلي وخت پیل او پای ته ورسوي او محصلینو ته یې ډاډ ورکړ، چې د هغوی د وړتیاوو، هڅو او زحمتونو له مخې به ورته نومرې ورکړل شي او د هر یو حق به خوندي وي.
د ازموینو په صحنو کې ممتحنو او ممایزو استادانو د پوهنتون مشرتابه ته په ازموینو کې د شفافیت تامین او ازموینې د اصولو سره سم ترسراوي ډاډ ورکړ.
