د ننګرهار پوهنتون د تضمین کیفیت مرکزي کمېټې غړو ددې پوهنتون له مشرتابه سره غونډه وکړه.
په نوموړې مشورتي ناسته کې د تضمین کیفیت کمېټې په فعالیتونو، کلنۍ بیاکتنې او د اکاډمیک اعتبار ساتلو پر موضوعاتو بحث او خبرې وشوې.
د ننګرهار پوهنتون رئیس پوهاند دوکتور خلیل احمد بهسودوال د مجلس د پرانیستې پر مهال د تضمین کیفیت کمېټې د مشرتابه او غړو مننه وکړه، چې د پوهنتون د اړوندو برخو د کیفیت ښه والي لپاره هلې ځلې کوي.
نوموړي تضمین کیفیت یوه دوامداره پروسه وګڼله، چې په وینا یې، د بشپړ اکاډمیک اعتبار ساتلو په خاطر لا زیات کار او هلو ځلو ته اړتیا ده.
د علمي چارو مرستیال پوهنمل احسان الله ناصح د کمېټې مسؤلینو او غړو ته د پوهنتون د اړوندو پوهنځیو او څانګو د کلنۍ بیاکتنې او ارزونې لارښوونه وکړه، چې د هغوی له خوا د اجرااتو ډاډ ورکړل شو.
د مجلس په وروستۍ برخه کې د ننګرهار پوهنتون د تضمین کیفیت داخلي واحد مسؤل د یاد بنسټ د فعالیتونو ګزارش د پوهنتون له مشرتابه سره شریک کړ.
