د ننګرهار پوهنتون د برېښنايي زده کړو کمېټې نوی مشر د یادې کمېټې غړو ته وروپېژندل شو
پوهنیار محمد یونس وزیري د برېښنايي زده کړو کمېټې د نوي مشر په توګه د ننګرهار پوهنتون د رئیس پوهاند دوکتور خلیل احمد بهسودوال له خوا د یادې کمېټې غړو ته وروپېژندل شو او د کمېټې د مخکېني مشر پوهنمل بادام نیازي د تېرو کړنو قدردانی وشو.
په همدې اړه د پوهنتون په ریاست مقام کې د یادې کمېټې له غړو استادانو سره ناسته وشوه، چې د پوهنتون د مشرتابه له خوا د کمېټې د مخکېني مشر پوهنمل بادام نیازي د فعالیتونو او خدمتونو ستاینه او قدردانی وشو.
پوهاند بهسودوال وویل: دا چې د ښاغلي پوهنمل نیازي د خدمت کاري موده پوره شوې، نو پر ځای يې د برېښنايي زده کړو کمېټې بل غړی پوهنیار محمد یونس وزیري د کمېټې د نوي مشر په توګه ټاکو.
نوموړي پوهنیار وزیري وړ علمي کادر یاد کړ، چې په وینا یې، په اړونده برخه کې کافي تجربه لري او په ټاکل کېدو سره به یې د کمېټې چارې لا زیاتې ښې او منظمې شي.
