د ننګرهار پوهنتون د اداري او مالي چارو نوى مرستيال ددې پوهنتون استادانو او منسوبينو ته وروپېژندل شو.
ښاغلى مسعود پیروزي د ننګرهار پوهنتون د مالي او اداري چارو د نوي سرپرست مرستيال په توګه ددې پوهنتون د رئيس پوهاند دوکتور خليل احمد بهسودوال له خوا د يوې غونډې په ترڅ کې رسماً د پوهنتون استادانو او اداري کارکوونکو ته ور وپېژندل شو.
په همدې مناسبت جوړې شوې غونډې ته د وينا پر مهال د ننګرهار پوهنتون رئيس پوهاند دوکتور خليل احمد بهسودوال ښاغلى پیروزي وړ، مستعد او په اداري چارو او نزاکتونو پوه شخص ياد کړ، چې په وينا يې، له دې وړاندې د کابل پوهنتون اداري او مالي مرستیال ؤ او په اداري او مالي برخه کې کافي تجربه لري.
نوموړي تمه څرګنده کړه، چې نوموړى به د پوهنتون د اداري او مالي چارو د اصلاح او معياري کېدو په برخه کې لا زيات اغېزمن ثابت شي.
پوهاند بهسودوال د مالي او اداري چارو د مخکېني مرستيال حمیدالله احمدزي په کړيو خدمتونو او لاسته راوړنو رڼا واچوله، ويې ويل: ښاغلي احمدزي د تېر څه دپاسه یو کلن ماموریت په موده کې د پوهنتون د اداري او مالي چارو د ريفورم او اصلاح په برخه کې زیات کار وکړ، چې مونږ یې قدردانی کوو.
د غونډې په پاى کې د ننګرهار پوهنتون د اداري او مالي چارو نوي سرپرست مرستيال ښاغلي مسعود پیروزي د لوړو زده کړو وزارت مقام او د ننګرهار پوهنتون مشرتابه مننه وکړه، چې پر ده يې ددې ستر مسؤليت باور وکړ.
نوموړي د خپلو خبرو پر مهال ورسپارل شوې دنده منصب نه، بلکې مسؤليت یاد کړ او ژمنه يې وکړه، چې په خپل ټول توان به يې په ښه ترسراوي کې هلې ځلې وکړي.
