د ننګرهار پوهنتون اداري کارکوونکو ته د (په اداره کې پلان جوړونه؛ خنډونه او حل لارې) تر سرلیک لاندې سيمینار دایر شو.
یاد سيمینار چې د ننګرهار پوهنتون د بشري سرچینو امریت اړوند د لوړتیا لوړونې عمومي مدیریت له خوا د پوهنتون اداري امرینو او مدیرانو ته دایر شو، پر مهال یې ګډونوالو ته د اداري کارونو د ښه مدیریت، غوره پلان جوړونې او د جوړ شوي پلان د تطبیق پر وړاندې خنډونو او ننګونو ته حل لارو پیدا کولو په اړه معلومات وړاندې شول.
د سيمینار د پرانیستې پر مهال د ننګرهار پوهنتون د بشري سرچینو آمر قاري جمیل مُحسن په اداره کې د پلان جوړونې په اړتیا او ارزښت خبرې وکړې او ګډونوالو ته یې سپارښتنه وکړه، چې د سيمینار د محتوا مسایل په ښه توګه زده او په خپلو کاري ساحو کې پلي کړي.
نوموړي د سيمینار د ارایه کوونکي استاد څخه مننه وکړه او راتلونکي کې یې د پوهنتون د ریاست مقام په ملاتړ د ورته نورو روزنیزو کورسونو او پروګرامونو د جوړېدو ژمنه وکړه.
د یادونې وړ ده، چې د سيمینار د تدریس او روزنې چارې د ننګرهار پوهنتون د عامه ادارې او پالیسۍ پوهنځي استاد پوهنمل منصور فقیرزي له خوا پر مخ وړل کېدې.
