د ننګرهار پوهنتون اداري او د تقرر او انفکاک مجلسونه ددې پوهنتون د رئيس پوهاند دوکتور خليل احمد بهسودوال په مشرۍ ترسره شول
په نوموړو کاري ناستو کې، چې د پوهنتون د علمي چارو مرستيال پوهندوى دوکتور محمد حامد کډوال، د محصلانو چارو مرستيال پوهندوى سيد اکرم هاشمي، د اداري او مالي چارو مرستیال حمیدالله احمدزي، د پوهنځيو او تدریسي روغتون رئيسانو او اداري کارکوونکو په کې برخه لرله، د پوهنتون د مالي، اداري، تدریسي، د استادانو د تقرر او يو شمېر نورو مسايلو په اړه بحث او خبرې اترې وشوې.
د پوهنتون د تدریسي بهیر کیفیت ښه والی، اداري چارو تنظیم او چټکوالی، پر وخت د محصلینو د بدل اعاشې اجراء، د اضافه کارۍ د توزیع راپور، د استادانو د تقرر څلور کیسونه او یو لړ نور متفرقه مسایل د دواړو مجلسونو د بحث عمده ټکي وو، چې له بحث او پرېکړو وروسته د بعدي اجرااتو په موخه اړوندو څانګو ته محول شول.
