د ننګرهار پوهنتون اداري، تقرر او انفکاک مجلسونه ددې پوهنتون د رئيس پوهاند دوکتور خليل احمد بهسودوال په مشرۍ ترسره شول.
په یادو کاري ناستو کې د پوهنتون د مشرتابه سربېره د ننګرهار ولایت د دولتي او خصوصي پوهنتونونو لپاره د لوړو زده کړو وزارت فوق العاده استازي او د ننګرهار پوهنتون د اداري او مالي چارو مرستیال قاضي خالد صداقت، د علمي چارو مرستیال پوهنمل احسان الله ناصح، د محصلانو چارو مرستیال پوهنوال سید اکرم هاشمي، د اړوندو پوهنځيو او تدریسي روغتون رئيسانو او ځینې اداري کارکوونکو هم برخه لرله.
د مجلسونو پرانیسته د ننګرهار پوهنتون د رئیس پوهاند دوکتور خلیل احمد بهسودوال په وینا سره وشوه او ورپسې د پوهنتون د علمي کادرونو د تقرر او انفکاک پر کیسونو، د فوق لیسانس او شپې برنامو د درسونو د پیل، د نوي مالي کال لپاره د پوهنځیو د اړتیاوو وړاندیز کولو، د استادانو او اداري کارکوونکو د حاضرۍ، چاپېریال ساتنې او یو لړ نورو متفرقه مسایلو په اړه بحث او لازمې پرېکړې وشوې.
