د ننګرهار او نورستان پوهنتونونو تر منځ د ګډو همکاریو هوکړه لیک لاسلیک شو.
د مسؤلينو په وينا، د یاد تفاهملیک له مخې به دواړه پوهنتونونه په علمي، تحقیقاتي، استادانو ظرفیت لوړونې، تضمین کیفیت، محصلینو عملي زده کړو او نورو برخو کې د راتلونکو ۳ کلونو لپاره یو له بل سره همکاري کوي.
یاد تفاهملیک د ننګرهار پوهنتون د رئیس شیخ انعام الله مدني او نورستان پوهنتون رئیس استاد حمیدالله عابد تر منځ د ننګرهار پوهنتون په ریاست مقام کې په داسې حال کې لاسلیک شو، چې د ننګرهار پوهنتون د کیفیت لوړاوي او اعتبار ساتنې داخلي واحد مسؤل پوهنمل حنیف الله باوري هم حضور درلود.
د ننګرهار پوهنتون قدرمن رئیس په خپله وینا کې یاد تفاهملیک د دواړو پوهنتونونو د متقابلو علمي او تحقیقاتي اړیکو پیاوړتیا او ګډو همکاریو پراختیا لپاره مهم وباله او هیله یې وښوده، چې له مخې به یې دواړه پوهنتونونه د علمي تجاربو تبادلې له لارې یو بل ته د پرمختګ زمینه برابره کړي.
د نورستان پوهنتون محترم رئیس په تېر کې د خپل پوهنتون سره د ننګرهار پوهنتون د مرستو او همکاریو مننه وکړه، د یاد تفاهملیک په امضاء کېدو یې خوښي وښوده او زیاته یې کړه، چې په یاد هوکړه لیک سره به د نورستان پوهنتون د استادانو او محصلینو ظرفیت لوړونې او نورو اکاډمیکو برخو کې مثبت پرمختګونه رامنځ ته شي.
