د لوړو زده کړو وزارت د بشري سرچینو ریاست ارزوونکي پلاوي د ننګرهار پوهنتون د تشکیلاتو بیاکتنه او ارزونه ترسره کړه.
د مولوي آغا په مشرۍ د ارزوونکو یاد درې کسیز پلاوی د سلواغې په ۱۰مه نېټه ننګرهار پوهنتون ته راغلی ؤ، چې د څلورو ورځو په موده کې یې ددې پوهنتون د مشرتابه په ملتیا د اړوندو پوهنځیو، تدریسي روغتون او اداري څانګو د تشکیلاتو لیدنه او ارزونه وکړه او د یادو برخو اړتیاوې یې په ګوته کړې.
د راغلي پلاوي مشر مولوي آغا د ننګرهار پوهنتون مشرتابه سره د لیدنې پر مهال وویل، چې د لوړو زده کړو وزارت د محترم مقام له حکم سره سم د بشري سرچینو ریاست او د تشکیلاتو د بیاکتنې کمېټې ته دنده سپارل شوې، چې د اړتیاوو او لازمي تعدیلاتو په موخه د پوهنتونونو د تشکیلاتو بیاکتنه او ارزونه ترسره کړي.
نوموړي وویل: په همدې موخه یې ننګرهار پوهنتون ته سفر کړی، چې ددې پوهنتون تشکیلاتي ارزونه ترسره کړي او د اړتیا په صورت کې ورته د نویو بستونو تدارک وکړي.
د ننګرهار پوهنتون رئیس پوهاند دوکتور خلیل احمد بهسودوال او د اداري او مالي چارو مرستیال پوهنیار قاضي خالد صداقت راغلي پلاوي ته د ښه راغلاست ویلو تر څنګ د لوړو زده کړو وزارت مقام مننه وکړه، چې د پوهنتونونو ستونزو ته رسېده ګي کوي.
نوموړو وویل، ننګرهار پوهنتون له ډېره وخته په علمي او اداري برخو کې د تشکیل او بستونو د کمي سره مخ ؤ، چې د پوهنتون ادارې د بار بار غوښتنو سره ورته لازمه پاملرنه نه وه شوې.
هغوی راغلي پلاوي ته سپارښتنه وکړه، چې د پوهنتون د ټولو برخو د تشکیلاتو دقیقه ارزونه وکړي او د شته نیمګړتیاوو د پوره کولو په برخه کې ورسره مرسته وکړي.
د یادونې وړ ده، چې راغلي پلاوي د څلورو ورځو په موده کې ددې پوهنتون د مشرتابه په ملتیا د اړوندو پوهنځیو، تدریسي روغتون او اداري څانګو د تشکیلاتو لیدنه او ارزونه وکړه او د یادو برخو اړتیاوې یې د پوره کولو په موخه په ګوته کړې.
