د لوړو زده کړو سرپرست وزیر د ننګرهار پوهنتون د محصلینو ستونزې او وړاندیزونه واورېدل.
د لوړو زده کړو سرپرست وزیر شیخ الحدیث مولوي نداء محمد ندیم په داسې حال کې، چې د ننګرهار پوهنتون مشرتابه پلاوي یې ملتیا کوله، د امام ابوحنیفه رح د غونډو په تالار کې د ننګرهار پوهنتون د اړوندو پوهنځیو د محصلینو لسګونه تنو استازو سره غونډه وکړه او د هغوی ستونزې او وړاندیزونه یې واورېدل.
د محصلینو استازو په خپلو خبرو کې د عملي زده کړو، علمي سیرونو، لوی تالار جوړېدو، د لابراتوارونو او کمپیوټر لیبونو تجهیزولو، تدریسي ودانیو او د سپورتي لوبغالو جوړېدو غوښتنه وکړه.
سرپرست وزیر د محصلینو استازو ته د وینا پر مهال هغوی خپلو مسؤلیتونو ته ځیر کړل او زیاته یې کړه، چې خپل وخت قیمتي وګڼي، د مسلکي زده کړو تر څنګ خپله دیني پوهه لوړه کړي او خپل وخت په بېهوده چارو کې مصرف نه کړي.
نوموړي همدا راز د پوهنتون د روان تدریسي بهیر د کمیت او کیفیت په اړه له محصلینو پوښتنې وکړې او هغوی ته یې د اړینو او لازمو درسي امکاناتو برابرولو وعده ورکړه.
په ورته مهال د لوړو زده کړو سرپرست وزیر د ننګرهار پوهنتون د مسلکي زده کړو پرمختیايي مرکز کې ددې ولایت د خصوصي پوهنتونونو او لوړو زده کړو موسسو مسؤلینو او استازو سره غونډه وکړه او هغوی ته یې د غوره او معیاري تحصیلي خدمتونو د ارایې سپارښتنه وکړه.
نوموړي همدا راز د یادو تحصیلي بنسټونو د مسؤلینو ستونزې او پېشنهادونه واورېدل او د حل په برخه کې یې د لازمو اجرااتو ډاډ ورکړ.
