د علمي چارو مرستیال د استادانو د تقرر او علمي ترفیع په کنفرانسونو کې ګډون وکړ.
د ننګرهار پوهنتون د علمي چارو مرستیال د دې پوهنتون د انجنیري پوهنځي د ۲ تنو استادانو د تقرر او علمي ترفیع په کنفرانسونو کې د یاد بهیر د ارزونې په موخه ګډون وکړ.
یاد کنفرانسونه د انجنيري پوهنځي د غونډو په تالار کې جوړ شوي وو، چې پر مهال یې د سیول انجنیري څانګې علمي کادر نامزد پوهنیار سبحان الله ساحل د پوهنیار علمي رتبې ته د ترفیع او اسد الله منیب د اوبو زېرمو او چاپېریال ساتنې انجنیري څانګې علمي کادر بست کې د تقرر په موخه خپل موضوعات ارایه کړل.
د کنفرانسونو د پرانیستې پر مهال د ننګرهار پوهنتون د علمي چارو مرستیال پوهندوی مولوي احسان الله ناصح په خپلو خبرو کې د استادانو د تقرر او علمي ترفیعاتو پروسې شفافیت په اړه ډاډ څرګند کړ او زیاته یې کړه، چې د یادې پروسې د روڼتیا او عادلانه ترسراوي لپاره به خپلو دوامداره هڅو ته ادامه ورکړي.
پوهندوی ناصح ټینګار وکړ، چې د استادانو د تقرر او علمي ترفیعاتو کنفرانسونه باید د ټاکلو معیارونو سره سم ترسره شي، تر څو د هغوی وړتیاوې، اکاډمیک فعالیتونه او لاسته راوړنې په سمه توګه وارزول شي.
د انجنیري پوهنځي مسؤلینو د پوهنتون علمي چارو مرستیال ته ډاډ ورکړ، چې په یاده پروسه کې به بشپړ شفافیت او عدالت په پام کې ونیسي.
