د زماني بنسټ استازي د ننګرهار پوهنتون له مشرتابه سره وليدل.
په ختیځ کې د زماني فاونډېشن اداري مسؤل رضا خان عصمتزي د ننګرهار پوهنتون رئيس پوهاند دوکتور خليل احمد بهسودوال سره وليدل.
په ياده لیدنه کې، چې د علمي چارو او محصلانو چارو مرستيالانو، د پوهنتون د بهرنیو اړیکو او رغنیزو چارو څارنې کمېټو، تهیه او تدارکاتو او نشراتو آمرینو برخه لرله، دواړو خواوو په پوهنتون کې د ځینو پروژو د تطبیق او همدارنګه د خپلواکۍ بېرته ګټلو د ۱۰۲ مې کالیزې د نمانځې مراسمو د مالي ملاتړ او سپانسر کولو په اړه بحث او خبرې وکړې.
ښاغلي عصمتزي د زماني بنسټ د مشرتابه له خوا په ننګرهار پوهنتون کې د خپلواکۍ بېرته ګټلو د ۱۰۲ مې کالیزې په مناسبت د جوړېدونکي علمي سیمینار د سپانسر کولو او همدارنګه د پوهنتون په لومړنۍ دخولي دروازه کې د پاتې سرک د کانکریټ چارو د پیل په اړه د پوهنتون رئیس ته د همکارۍ ډاډ ورکړ.
نوموړي دغه راز وویل، چې زماني بنسټ غواړي، چې له ننګرهار پوهنتون سره د علمي او روزنیزو مرکزونو د جوړولو په برخه کې مرسته او همکاري وکړي.
د ننګرهار پوهنتون رئیس پوهاند دوکتور خلیل احمد بهسودوال د زماني فاونډېشن له مسؤلینو او په ځانګړې توګه د یاد بنسټ د مشر ښاغلي مصطفی زماني مننه وکړه، چې تل یې د علمي او تحصیلي بنسټونو مرسته او ملاتړ کړی او زیاته یې کړه، چې د پوهنتون اداره به ډېر ژر د اړوندو برخو پروپوزلونه ورته وسپاري.
