د انجنيري پوهنځي نوی مرستیال د یاد پوهنځي استادانو او منسوبینو ته وروپېژندل شو
د انجنيري پوهنځي استاد پوهنیار شاپور کوشککی د ننګرهار پوهنتون د رئیس پوهاند دوکتور خلیل احمد بهسودوال له خوا د انجنيري پوهنځي د نوي مرستیال په توګه د نوموړي پوهنځي استادانو او منسوبینو ته وروپېژندل شو او د مخکېني مرستیال پوهنیار انجنیر محمد شاکر فاروقي د هڅو او خدمتونو تقدیر او ستاینه وشوه.
په همدې اړه جوړو شویو مراسمو ته د وینا پر مهال د ننګرهار پوهنتون رئیس پوهاند دوکتور خلیل احمد بهسودوال پوهنیار کوشککی وړ او په کار پوه شخص یاد کړ، چې په وینا یې، په راتګ سره به یې د پوهنځي چارې لا زیاتې ښې او منظمې شي.
پوهاند بهسودوال د مخکېني مرستیال پوهنیار انجنیر محمد شاکر فاروقي د هلو ځلو او خدمتونو ستاینه وکړه او زیاته یې کړه، چې ښاغلي فاروقي نه یوازې د انجنیري، بلکې د ټول پوهنتون د رغنیزو او اکاډمیکو چارو د بهبود لپاره نه ستړې کېدونکې هلې ځلې کړي، چې مونږ ترې مننه کوو او د لایزال رب (جله جلاله) له درباره ورته د اجر غوښتنه کوو.
د انجنيري پوهنځي نوي مرستیال پوهنیار شاپور کوشککي د پوهنتون او پوهنځي له مشرتابه مننه وکړه، چې په نوموړي یې ددې دندې باور وکړ او ژمنه یې وکړه، چې په خپل ټول توان سره به د پوهنځي د پرمختګ لپاره هلې ځلې وکړي.
