د امام ابو حنیفه (رحمه الله) تخصصاتو دیني جامعې رئیس د ننګرهار پوهنتون له مشرتابه سره ولیدل.
په یاده لیدنه کې، چې د پوهنتون په ریاست مقام کې ترسره شوه، د امام ابو حنیفه (رحمه الله) تخصصاتو دیني جامعې د تدریسي او اداري چارو د ښه والي او د دواړو ریاستونو په ورځنیو چارو کې د همغږۍ رامنځ ته کولو په موخه مشورې او نظریات شریک شول.
د ننګرهار پوهنتون رئیس شــیخ انعام الله مدني د امام ابو حنیفه (رحمه الله) تخصصاتو دیني جامعې ترسره کړي فعالیتونه او پرمختګونه وستایل او د یادې جامعې رئیس ته یې د هر راز همکارۍ ډاډ ورکړ.
د امام ابو حنیفه (رحمه الله) تخصصاتو دیني جامعې رئیس ابــوالاسد الشهيد مُــفتي حـزب الله الــحقــاني د ننګرهار پوهنتون له رئیس او مرستیالانو مننه وکړه، چې تل یې د هغوی له چارو ملاتړ کړی، د ښه والي په موخه یې ورسره لازمې مشورې شریکي کړي او زیاته یې کړه، چې د یادې جامعې د چارو تنظیم او معیارونو پلي کولو په برخه کې یې نه ستړې کېدونکې هلې ځلې ترسره کړي دي.
د لیدنې پر مهال د ننګرهار پوهنتون او دیني تخصصاتو جامعې رئیسانو سربېره د ننګرهار پوهنتون د علمي چارو مرستیال پوهندوی مــولوي احسان الله ناصح، د مالي او اداري چارو مرستیال پوهنیار قاضي خالد صداقت او د دیني تخصصاتو جامعې علمي مرستیال مُــفتي محمد یونس الراشد هم حضور درلود.
سرچینه: د عامه اړیکو، اطلاعاتو او نشراتو امریت
