د امارتي او خصوصي پوهنتونونو ۱۵ تنو بې وزله محصلینو څخه مالي ملاتړ وشو.
لوړو زده کړو وزارت سره د (HHRD) نړیوالې خیریه مؤسسې د شوې هوکړې له مخې به د یادې مؤسسې د زده کړو ملاتړ پروګرام په لړ کې د ننګرهار پوهنتون او د یو شمېر ننګرهار مېشتو خصوصي لوړو زده کړو مؤسسو ۱۵ تنو بې وزله محصلینو سره د پوهنتون فیسونو ورکړې، قرطاسیې او ترانسپورت سهولت برابرولو برخه کې همکاري ترسره شي.
په همدې موخه د (HHRD) نړیوالې خیریه مؤسسې د ختیځ زون او ننګرهار پوهنتون مسؤلینو په حضور کې د۶۰ تنو عارضو بې وزله محصلینو تر منځ قرعه کشي وشوه، چې په پایله کې یې ۱۵ تنه د ۴ کلونو لپاره دیادې موسسې د مالي ملاتړ مستحق وګرځېدل.
په همدې پار د محصلانو خدمتونو همغږۍ امریت له خوا په جوړه شوې غونډه کې د ننګرهار پوهنتون محصلانو چارو مرستیال پوهنیار حافظ سید محمد قاسم هاشمي د (HHRD) خیریه مؤسسې د یاد اقدام ستاینه وکړه او محصلینو ته د مالي مرستو مهیا کولو اړوند یې د خپلو هڅو یادونه وکړه.
نوموړي محصلینو ته سپارښتنه وکړه، چې یاد مالي ملاتړ ستر فرصت وګڼي او د خپل ځان د مسلکي روزنې لپاره ترې ګټه واخلي.
د (HHRD) نړیوالې خیریه مؤسسې د ختیځ زون د همغږۍ مسؤل شاکر الله امین په خپلو خبرو کې د زده کړو ملاتړ پروګرام څخه د ګټې اخیستونکو محصلینو او د هغوی د جذب پروسې په اړه معلومات ورکړل.
نوموړي وویل: په مجموعي توګه د دې ۱۵ تنو په شمول د امارتي او خصوصي پوهنتونونو ۴۵ تنه محصلین د زده کړو ملاتړ پروګرام له لارې بېلابېلو پوهنتونونو کې په زده کړو بوخت دي او اداره یې هڅه کوي چې دا شمېر زیات کړي.
د غونډې په پای کې د محصلینو تر منځ قرعه کشي وشوه او د ۶۰ تنو په شرایطو برابرو محصلینو له منځه ۱۵ تنه مستحق محصلین وټاکل شول.
