د افغانستان د خپروونکو اتحادیې مسؤلینو د ننګرهار پوهنتون رئیس سره ولیدل.
د افغانستان د خپروونکو اتحادیې رئیس استاد سید احمد سعید د یوه پلاوي په ملتیا د ننګرهار پوهنتون رئیس پوهاند دوکتور خلیل احمد بهسودوال سره ولیدل.
په یاده لیدنه کې، چې په ختیځ کې د نوموړې ټولنې مسؤلینو او د ننګرهار د خپرندویو ټولنو استازو هم په کې برخه لرله، دواړو لورو د مطبوعاتي او نشراتي نظام د معیاري کېدو او په دولتي او خصوصي پوهنتونونو او تحصیلي موسساتو کې د کاپي رایټ قانون د تطبیق پر مواردو بحث او خبرې وکړې.
د ننګرهار پوهنتون رئیس راغلي پلاوي ته د همکارۍ ډاډ ورکړ او زیاته یې کړه، چې نوموړې موضوع به د پوهنتون په علمي او نشراتي بوردونو کې مطرح او په جدي توګه به یې له اړوندو ارګانونو سره تعقیب کړي.
