د اداري او مالي چارو مرستیال د کرنې پوهنځي د چارو ارزونه وکړه.
د ننګرهار پوهنتون د اداري او مالي چارو مرستیال مـُفتي نعمت الله اعزازي ددې پوهنتون د بشري سرچینو آمر قاري جمیل مُحسن په ملتیا د کرنې پوهنځي څخه لیدنه وکړه او د یاد پوهنځي پرمختګونه، غوښتنې او اړتیاوې یې له نږدې وارزولې.
د لیدنې پر مهال د کرنې پوهنځي رئیس پوهنوال دوکتور رشاد احمد شېرزاد د اداري او مالي چارو مرستیال ته د خپل پوهنځي د لیسانس او فوق لیسانس برنامو د اوسني وضعیت، تحقیقاتي فارمونو کې د روانو څېړنیزو پروژو، د پوهنځي د چارو پر وړاندې شته خنډونو او اړتیاوو په اړه معلومات ورکړل او نوموړي سره یې خپلې غوښتنې شریکې کړې.
د اداري او مالي چارو مرستیال ښاغلي اعزازي په خپلو خبرو کې پوهنتونونه د مسلکي زده کړو تر څنګ د فکري روزنې اصلي مراکز یاد کړل او سپارښتنه یې وکړه، چې محصلینو ته باید د مسلکي زده کړو تر څنګ اسلام مبارک دین او هېواد سره د مینې او وفادارۍ درس هم ورکړل شي.
نوموړي د کرنې پوهنځي د حاضرۍ کتاب چیک کولو تر څنګ د پوهنځي له مسؤلینو او استادانو څخه مننه وکړه، چې خپلو کارونو کې هلې ځلې کوي او ژمنه یې وکړه، چې په اداري او تدارکاتي برخو کې به یې اړتیاوې او ستونزې حل کړي.
