دساينس پوهنځي په اړه
دا چې زمونږ په ګران هیواد کې صنایع د نسبي انکشاف په حالت کې قرار لري او همدارنګه په معارف کې د شاګردانو زیاتوالي او د مسلکې استادانو کمښت ، ددې باعث ګرځیدلی چې د ساینس پوهنځی د ننګرهار پوهنتون په چوکات کې ایجاد شي نو په همدې اساس د ساینس پوهنځی د ننګرهار پوهنتون یو د هغه پوهنځیو څخه دی چې په۱۳۹۰ کال کې تأسیس شوی چې د ریاضی – فزیک او کېمیا – بیولوژي ډیپارتمنتونو لرلو سره په فعالیت شروع کړی او په ۱۳۹۴ کال کې خپل لومړنی فارغان د لسانس په سویه په یاد څانکو کې جامعی ته وړاندی کړ. د یاد پوهنځي اکادمیک جوړښت په ۱۳۹۳ کال کې تغیېر وموند په پروګرمونو کې یې اصلاحات رامنځته شوه، پروګرامونه یې اختصاصی شکل غوره کړ اوس د ریاضی ، فزیک ، کېمیا ، بیو لوژي او جیولوجي معادن ډیپارتمنتونو لرونکی دی. د یاد پوهنځي د ډیپارتمنتونو په درسي پروګرامونو کې اساسي، اختصاصي ، فرعي او پوهنتوني مضامین شامل دي. یاد پوهنځی نهه کمېټې لري ، همدارنګه په یاد پوهنځي کې د کریډیت په سیستم تدریسي پروګرامونه مخکې بیول کېږي په یاد پوهنځي کې د ساینس پوهنځي د رشد او انکشاف لپاره د جرمني هیواد د وردز بورګ پوهنتون د DAAD موسسې د مالي مرستې په همکارۍ د لابراتوارونو سامان تهیه او نصب شو او هم یوشمیر کتابونه پوهنځي ته واخېستل شوه چې د پوهنځي استادان او محصلان ورڅخه ګټه اخلی.
د ساینس پوهنځي ودانۍ د پاکستان هیواد په مالي مرسته جوړه شوې چې یوه معیاري ودانۍ ده او په کافي اندازې سره تدریسي خونې لري .
اوس مهال په دغه پوهنځي کې ۵ ډیپارتمنتونه فعال او استادان يې په بېلا بېلو څانګو کې تدريس کوي او خپل علمي فعاليتونه پر مخ وړي.
اوس مهال پدې پوهنځی کې (۷۲۲) محصلان په زده کړه بوخت دي چې د هر تعليمي کال په پای کې لږ تر لږه (۲۰۰ - ۳۰۰) پورې فارغ محصلان خپلې ټولنې ته د چوپړ په موخه وړاندې کوي. د نويو زده کوونکو د نوم ليکنې او شامليدنې شمير په هر يو کال کې ۳۵۰ – ۴۰۰ پورې تنو ته رسيدلی او لا هم پسې زياتيږي.