د ننګرهار پوهنتون شرعیاتو پوهنځي استادانو د لوړو زده کړو سرپرست وزیر سره غونډه وکړه.
یاده غونډه، چې د شرعیاتو پوهنځي د امام ابو حنیفه رح د غونډو په تالار کې جوړه شوې وه، د پوهنتون رهبرۍ سربېره په کې د یاد پوهنځي مسؤلینو او د ټولو څانګو استادانو برخه لرله، چې پر مهال یې د شرعیاتو پوهنځي اړوند موضوعاتو، د تدریسي بهیر د پرمختګ او اسلامي زده کړو په برخه کې د اغېزمنو پلانونو تطبیقولو په اړه بحث او خبرې وشوې.
د غونډې پر مهال د لوړو زده کړو سرپرست وزیر شیخ الحدیث مولوي نداء محمد ندیم د خپلې وینا پر مهال په اسلامي علومو او دیني مسایلو کې محصلینو ته د اساسي پوهې انتقال، د هغوی صورت او سیرت اصلاح کولو او په لوړه اسلامي روحیه د محصلینو په روزنه ټینګار وکړ.
نوموړي استادانو ته سپارښتنه وکړه، چې د استادۍ سپېڅلي مسلک د ټولو اصولو او معیارونو په پام کې نیولو سره د خپل مسلمان ملت د بچیانو په روزنه کې پوره اخلاص وکړي، تر څو په راتلونکي کې مسلکي، متخصص، اسلامي ارزښتونو ته قایل، مذهبي او فکري کادرونه ټولنې ته وړاندې کړي.
د شرعیاتو پوهنځي د استادانو په استازیتوب د یاد پوهنځي رئیس پوهاند سید محبوب شاه هاشمي د لوړو زده کړو سرپرست وزیر صاحب ته په ذکر شویو برخو کې د عاجلو اجرااتو او اقداماتو ډاډ ورکړ.
