د طب پوهنځي علمي مجله (طبي پوهه) چاپ شوه
د ننګرهار پوهنتون طب پوهنځي علمي ژورنال طبي پوهې ۱۹ مه ګڼه د بېلابېلو طبي مطالبو په لرلو سره چاپ او خپره شوه.
د مسؤلینو په وینا، په دغه علمي، څېړنیزه درې میاشتنۍ مجله کې د طب پوهنځي د بېلابېلو څانګو د علمي کادر غړو او استادانو ۱۹ علمي او څېړنیزې مقالې خپرې شوي، چې زیاتره یې پر طبي موضوعاتو راڅرخي.
په یاده طبي مجله کې د روغتیايي خدمتونو معیاري کېدو، ناروغیو تشخیص، پېژندنې، درملنې لارو چارو او په روغتیايي برخه کې د تازه پرمختګونو او ترسره شویو څېړنو اړوند معلومات او مقالې خپریږي.
ننګرهار پوهنتون د پوهې، حق، طبي پوهې، کرکيلې، شريعت وړانګې او ادب پوهې په نومونو شپږ علمي مجلې او د بایو ساینس په برخه کې یو نړیوال علمي ژورنال لري، چې ددې پوهنتون د استادانو علمي او څېړنیزې مقالې چاپ او د پوهې مينه والو ته رسوي.
