د ننګرهار پوهنتون د دې اوونۍ خبرونه! نېټه: ۱۴۰۴ غبرګولي ۲۹ مه

۱- د ننګرهار پوهنتون رئیس شیخ انعام الله مدني د غبرګولي په ۲۴ مه نېټه په دې پوهنتون کې د روانو ازموینو له بهیر څخه د نظم و شفافیت ارزونې په موخه لیدنه وکړه.
د پوهنتون رئیس د اړوندو پوهنځیو مسؤلینو، ممتحنو او ممایزو استادانو ته په ازموینو کې د انضباط، شفافیت او ټاکلو معیارونو رعایت سپارښتنې وکړې.

۲ـ د لوړو زده کړو محترم وزارت په هدایت ننګرهار پوهنتون پوهنې ریاست سره په همغږۍ په مرکز او ولسوالیو کې د لسګونو امارتي او خصوصي لېسو زده کوونکو ته د کانکور ملي ازموینې په اړه د عامه پوهاوي ورکشاپونه دایر کړل.
د یادو ورکشاپونو پر مهال زده کوونکو ته د کانکور ازموینې څرنګوالي، نويو معلوماتو او تګلارو او یادې ازموینې ته د چمتووالي په هکله اړینې لارښوونې وشوې.

۳ـ ننګرهار پوهنتون کې ۴۰۰ تنه محصلین د کمپیوټر کورس څخه فارغ شول.
د ننګرهار پوهنتون محصلانو خدمتونو همغږۍ امریت د دوه تنو استادانو پر مټ د څلور میاشتني کورس پر مهال د دې پوهنتون د ۱۴ ګونو پوهنځیو ۴۰۰ تنو محصلینو ته د کمپیوټر اړوند (Microsoft Office) پروګرامونو کې روزنه ورکړه او هغوی ته یې د عملي او تحریري ازموینو په پایله کې د فراغت سندونه ورکړل.

۴ـ ننګرهار پوهنتون کې د روانې جوزا میاشتې په ۲۶ مه نېټه د ۱۴۰۴ لمریز کال کانکور ازموینې لپاره د بایومتریک معلوماتو د ثبت پروسه پیل شوه او دوه ورځې یې دوام وکړ.
یاده پروسه له ټاکلي وخت سره سم د سهار په ۴:۳۰ بجو پیل شوه، چې په ترڅ کې یې د دولسمو او څوارلسمو ټولګیو نږدې لس زره تنه ګډونوال بایومتریک شول.

۵ـ د ننګرهار پوهنتون طب پوهنځي څخه فارغو ستاژر ډاکترانو ته د (څېړنې میتودولوژي) ۱۲ ورځنی ورکشاپ پیل شو.
یاد ورکشاپ د روغتیا نړیوال سازمان په مالي ملاتړ د طب پوهنځي د بېلابېلو څانګو څخه فارغو (۶۰) تنو ستاژر ډاکترانو ته دایر شو، چې د روزنې چارې یې د همدې پوهنځي درې تنه استادان پر مخ وړي.

۶ـ د ننګرهار پوهنتون د علمي چارو مرستیال پوهندوی مولوي احسان الله ناصح او د محصلانو چارو مرستیال شیخ شاکر الله وحدت د ازموینو مرکزي کمېټې غړو په ملتیا پوهنتون کې د روانو ازموینو له بهیر څخه لیدنه وکړه.
نوموړو مسؤلینو ته په ازموینو کې د ټاکلو اصولو، نظم و دسپلین او شفافیت سپارښتنه وکړه او محصلینو ته یې ډاډ ورکړ، چې د هغوی د وړتیاوو او هلو ځلو په اساس به ورته نومرې ورکړل شي او د ټولو حقوق به خوندي وي.

۷ـ د ننګرهار پوهنتون له شرعياتو او کمپیوټر ساینس پوهنځيو څخه (۲۸۵) تنه مسلکي کادرونه فارغ شول.
د فارغو شویو له ډلې ۱۱۵ تنه د شرعياتو پوهنځي له فقهې او قانون او اسلامي تعلیماتو او ۱۷۰ تنه د کمپیوټر ساینس پوهنځي له معلوماتي سیستمونو، معلوماتي ټکنالوژۍ او سافټویر انجنیري څانګو څخه فارغ او ټولنې ته د خدمت په موخه وړاندې شول.

۸- ننګرهار پوهنتون کې د ۱۴۰۴ تحصیلي کال کانکور ازموینې د اخیستنې بهیر پیل شو.
یاده ازموینه، چې د جوزا په ۲۸ مه نېټه پیل شوه، درې ورځې دوام کوي او په ترڅ کې به یې د ننګرهار ولایت د دولسمو او څوارلسمو ټولګیو له نږدې لس زره تنو فارغانو څخه ازموینه واخیستل شي.