د ننګرهار پوهنتون مرکزي کمپس او اړوندو پوهنځیو د باغونو بیارغاونه پیل شوه.
یاده چاره د سپین غر باختر کرنیز شرکت په مرسته ترسره کېږي، چې په ترڅ کې به یې د پوهنتون باغونه، ونې او بوټي په معیاري بڼه ورغول شي.
د یادو چارو پرانیسته د چنګاښ په ۲مه نېټه د ننګرهار پوهنتون رئيس پوهاند دوکتور خلیل احمد بهسودوال له خوا په داسې حال کې وشوه، چې د لوړو زده کړو وزارت فوق العاده استازي او د ننګرهار پوهنتون د اداري او مالي چارو مرستيال پوهنیار قاضي خالد صداقت، د علمي چارو او محصلانو چارو مرستيالانو او د سپین غر باختر کرنیز شرکت مسؤلینو یې ملتیا کوله.
پوهاند بهسودوال د سپین غر باختر کرنیز شرکت د مسؤل او د کرنې پوهنځي د استاد پوهنیار محمد غني راغب ددغه نېک اقدام ستاینه وکړه او زیاته یې کړه، چې په یادو رغنیزو چارو کې د پوهنتون د مرکزي کمپس او اړوندو پوهنځیو د باغونو شاخ بوري، قلبه کول، په عصري بڼه د اوبه خور سیستم جوړول، د اړتیا وړ دواګانو، سرو او چونې ورکول او نور شامل دي، چې د یو کال په موده کې به د نوموړي شرکت له خوا ترسره شي.
