په ختيځ کې د نړيوال روغتيايي سازمان مسؤلینو د ننګرهار پوهنتون مشرتابه سره ولیدل.
په ختيځ کې د نړيوال روغتيايي سازمان (WHO) د پولیو برخې مسؤل ډاکتر میزان الرحمن د یوه پلاوي په ملتیا د ننګرهار پوهنتون رئیس پوهاند دوکتور خلیل احمد بهسودوال سره ولیدل.
په یاده لیدنه کې، چې د پوهنتون د علمي تحقیقاتو کمېټې مسؤلینو هم په کې برخه لرله، د پوهنتونونو د محصلینو له خوا په ختیزو څلورو ولایتونو کې کور په کور د پوليو پر ضد د واکسينو د ترسره کېدونکو کمپاينونو د څارنې او سروې بهیر د بیا پیلېدو او په یاده برخه کې د شته ستونزو او نیمګړتیاوو د له منځه وړلو په اړه بحث او خبرې وشوې.
ډاکتر میزان الرحمن د ننګرهار پوهنتون د ادارې مننه وکړه، چې د پولیو واکسینو کمپاین د نظارت او څارنې په برخه کې ورسره همکار دي، چې له امله یې د یادې پروسې موثريت زیات شوی.
نوموړي په راتلونکې کې هم د یادې مرستې پر دوام ټینګار وکړ، چې د پوهنتون د مشرتابه له خوا ورته په اړونده برخه کې د همکارۍ ډاډ ورکړل شو.
د یادونې وړ ده، چې د ننګرهار پوهنتون محصلين په ننګرهار ولايت کې د ٢٠١٣ کال راهيسې د پوليو ضد واکسينو د کمپاينونو نظارت او څارنه کوي، چې په دې وروستیو کې دا لړۍ د کونړ، لغمان او نورستان ولایتونو ته هم غځېدلې ده.
