د ننګرهار پوهنتون د حقوقو او سیاسي علومو پوهنځي د نیمه کاره ودانۍ د جوړېدو چارې به ډېر ژر پیل شي.
د نوموړې ودانۍ مخکېنی قرارداد فسخه شوی او د ټاکل شوي هیئت له خوا د ترسره شوي کار د سنجولو وروسته به یې پاتې کار د جمهوري ریاست د عملیاتي واحد له خوا بشپړ شي.
یادې خبرې د عملیاتي واحد د ننګرهار د څانګې رئیس او نوموړې موضوع ته د ټاکل شوي هیئت مشر انجنیر وفیع الله احمدزي د ننګرهار پوهنتون رئیس پوهاند دوکتور خلیل احمد بهسودوال سره د لیدنې پر مهال وکړې.
ښاغلي احمدزي زیاته کړه، چې د نوموړې ستونزې د هواري په موخه د ملي شرکت، لوړو زده کړو وزارت او د ښار جوړولو او ځمکو وزارت ګډ هیئت ټاکل شوی، چې د هیئت له خوا د کار احجام سنجول کېږي او له هغې وروسته به د ودانۍ د جوړېدو چارې عملاً پیل شي.
د ننګرهار پوهنتون رئیس پوهاند دوکتور خلیل احمد بهسودوال د ملي شرکت له مسؤلینو مننه وکړه، چې د پوهنتون ستونزو ته یې همېش رسېده ګي کړې او زیاته یې کړه، چې د حقوقو او شرعیاتو پوهنځیو نیمه کاره ودانیو د یادو پوهنځیو د علمي برنامو او اکاډمیک پرمختګ مخه نیولي، چې د چارو په بشپړاوي به یې د استادانو او محصلینو ستونزې تر ډېره بریده حل شي.
د یادونې وړ ده، چې د شرعیاتو پوهنځي د ودانۍ مخکېنی قرارداد هم فسخه شوی او د نوموړې ودانۍ د ترسره شوي او پاتې کار د سنجش لپاره به هم ډېر ژر د ذکر شویو ادارو له خوا یو باصلاحیته هیئت ننګرهار پوهنتون راشي.
