ننګرهار پوهنتون کې د سولې ټینګښت او شخړو حل پنځه ورځنى ورکشاپ پای ته ورسېد
ياد ورکشاپ، چې د سولې مرکز په نوښت جوړ شوى ؤ، د ننګرهار پوهنتون د بېلابېلو پوهنځیو ٢٥ تنو محصلينو په کې برخه لرله.
د ننګرهار پوهنتون رئیس پوهاند دوکتور خلیل احمد بهسودوال په افغاني ټولنه کې د ټولنيزې سولې د ټینګښت پر اړتيا خبرې وکړې او په ياده برخه کې يې د عامه افکارو د مثبت تغير په برخه کې دا ډول روزونکي پروګرامونه اغېزمن وبلل.
پوهاند بهسودوال د ننګرهار پوهنتون سولې مرکز نوښتونه او ابتکارات وستایل او د یاد مرکز د مسؤلینو او غړو محصلینو یې غوښتنه وکړه، چې په پوهنتون کې د مثبت فکري او فزیکي تغیر لپاره لاس په کار شي.
د ننګرهار پوهنتون د محصلانو چارو مرستیال پوهندوی سید اکرم هاشمي او د سولې مرکز د محصلينو او ځوانانو کلب مشر پوهنيار احمد جميل پوپلزى نور ويناوال وو، چې د ورکشاپ د ارزښت او موخو په اړه یې ګډونوالو ته معلومات ورکړل.
په پای کې د پوهنتون د مشرتابه له خوا پر محصلینو سندونه وویشل شول.
