د ننګرهار پوهنتون رئیس ددې پوهنتون د مرکزي کفټيریا ودانۍ د جوړېدو چارو څخه لیدنه وکړه
د ننګرهار پوهنتون رئيس پوهاند دوکتور خليل احمد بهسودوال په داسې حال کې، چې د علمي چارو مرستيال پوهندوى دوکتور محمد حامد کډوال، د محصلانو چارو مرستيال پوهندوى سيد اکرم هاشمي او د اداري او مالي چارو مرستيال حميدالله احمدزي یې ملتیا کوله، د پوهنتون د مرکزي کفټیریا ودانۍ د جوړېدو چارې له نږدې ولیدي.
د لیدنې پر مهال د پوهنتون مشرتابه د اړوند شرکت مسؤلینو ته لارښوونه وکړه، چې د ودانۍ چارې باید له پلان سره سم په معیاري ډول په خپل وخت سرته ورسوي، چې د شرکت د مسؤلینو له خوا ورته ډاډ ورکړل شو.
د یادونې وړ ده، چې د پوهنتون د مرکزي کفټيریا وداني د دوه هالونو، درې دوکانونو، یو ستر پلورنځي، عمومي اشپزخانې او نورو اړوندو ملحقاتو په لرلو سره په ۴۱۶ متره مربع ساحه کې د نږدې ۶ میلیونه افغانیو په لګښت جوړېږي.
