د ننګرهار پوهنتون او الفلاح پوهنتون ترمنځ د ګډو علمي او څېړنیزو همکاریو تفاهملیک لاسلیک شو.
د مسؤلینو په وینا، د دغه درې کلن تفاهملیک له مخې به دواړه پوهنتونونه د مهمو علمي او څېړنیزو موضوعاتو په اړه ګډې څېړنې ترسره کوي، استادانو او محصلینو ته به د څېړنیزو فعالیتونو لپاره مناسب فرصتونه او اسانتیاوې برابروي او علمي کنفرانسونه، ورکشاپونه، سیمینارونه، لکچرونه او نور روزنیز پروګرامونه تنظیموي.
همدارنګه به دواړه لوري په داخلي او نړیوالو علمي ژورنالونو کې د استادانو د علمي او څېړنیزو مقالو د خپرولو، څېړنیزو تجربو تبادلې او د علمي ظرفیتونو د لوړولو په برخه کې متقابله همکاري کوي.
دغه تفاهملیک د ننګرهار پوهنتون د علمي څېړنو مرستیال پوهندوی دوکتور سعید محمد وقار او د الفلاح پوهنتون د علمي څېړنو مرستیال عمران الله اختر ترمنځ په هغې غونډه کې لاسلیک شو، چې د ننګرهار پوهنتون او خصوصي پوهنتونونو د علمي څېړنو مرستیالانو تر منځ د څېړنیزو همکاریو د پراختیا، ګډو علمي اړیکو د پیاوړتیا او روانو څېړنیزو فعالیتونو د ارزونې په موخه جوړه شوې وه.
سرچینه: د نشراتو او عامه اړیکو امریت
