د ننګرهار پوهنتون د روان تحصیلي کال د پسرلني سمستر نهايي ازموينې پيل شوې.
د پوهنتون د مسؤلینو په وینا، یادې ازموینې چې نن ورځ (د غبرګولي په ۱۱ مه) نېټه پیل شوې، درې اوونۍ دوام کوي او په ترڅ کې به یې د لیسانس دورې د ورځې، شپې او ماسترۍ پروګرامونو محصلینو ازموینه واخیستل شي.
د ازموینې پرانیسته په انجنیري پوهنځي کې وشوه، چې د یاد پوهنځي د مسؤلینو سربېره په کې د ننګرهار پوهنتون عمومي رئیس شیخ انعام الله مدني، د ازموینو کمېټې مشر پوهاند کریم الله بیدار او یو شمېر استادانو برخه لرله.
د ننګرهار پوهنتون عمومي رئیس د پرانیستې مراسمو ته په وینا کې محصلین متوجه کړل، چې په منظمه توګه ازموینې ورکړي، ټاکلي اصول او ضوابط مراعت کړي او ازموینو ته پوره اماده ګۍ سره راشي.
د پوهنتون مشرتابه همدا راز د ازموینو له صحنو څخه د لیدنې پر مهال د پوهنځيو مسؤلینو او استادانو ته لارښوونه وکړه، چې ازموينې باید په پوره روڼتيا او شفافيت واخلي او پايلې يې په خپل وخت له محصلينو سره شريکې کړي.
د پوهنتون عمومي رئیس دغه راز د ازموینو مرکزي کمېټې مسؤلینو ته سپارښتنه وکړه، چې د پوهنتون او پوهنځیو په کچه د ازموینو بهیر وڅاري او راپور یې وخت په وخت د پوهنتون له ادارې سره شریک کړي، چې د هغوى له خوا ورته په اړونده برخه کې د اجرااتو ډاډ ورکړل شو.
د یادونې وړ ده، چې د ازموینو صحنې هره ورځ د سهار په اته نیمو بجو پیلېږي او دوه ساعته دوام کوي.
سرچینه: د اطلاعاتو، نشراتو او عامه اړیکو امریت
