د امام ابوحنیفه رحمه الله دیني تخصصاتو جامعې څخه (۳۷) تنه فاضلان فارغ شول.
ننګرهار پوهنتون کې د امام ابوحنیفه رحمه الله دیني تخصصاتو جامعې د ۱۴۴۷ هـ ق کال په لومړۍ دوره کې ۳۷ تنه فاضلان چې د افتاء او قضاء په څانګه کې یې د تخصص (دکتورا) تر کچې دوه کلنې زده کړې ترسره کړې، فارغ او ټولنې ته د خدمت په موخه وړاندې کړل.
په همدې پار د ننګرهار پوهنتون په جامع مسجد کې د فراغت غونډه جوړه شوې وه، چې د لوړو زده کړو محترم وزارت د دیني تخصصاتو او جامعاتو لوی رئیس، د امام ابوحنیفه رحمه الله دیني تخصصاتو جامعې رئیس او مرستیالانو، د ننګرهار پوهنتون رئیس او مرستیالانو، د ولایتي ادارې مسؤلینو، د هېواد جیدو علماوو او شیوخ کرامو، دعوت او ارشاد مسؤلینو، نومیالیو نعت خوانانو، ترانه ویونکو، شاعرانو او د فارغو فاضلانو د کورنیو غړیو او خپلوانو په کې برخه لرله.
غونډې ته په وینا کې د لوړو زده کړو محترم وزارت د دیني تخصصاتو او جامعاتو لوی رئیس شیخ اسد الله فرید د امام ابوحنیفه رحمه الله دیني تخصصاتو جامعې په لومړۍ دوره فراغت خوښي څرګنده کړه او یاده لاسته راوړنه یې د هېواد په داخل کې د علم، افتاء او قضاء په عرصه کې د مسلکي علماوو د روزنې لپاره بختور پیل وباله.
نوموړي د افتاء او قضاء څانګې د یادو فارغو متخصصینو په روزنه کې د هغوی د استادانو هڅې د قدر وړ یادې کړې او زیاته یې کړه، چې لوړو زده کړو وزارت ژمن دی چې د هېواد په کچه دیني تخصصي پروګرامونه لا زیات منظم او پیاوړي کړي، څو فارغېدونکي علماء کرام او د شرعي علم متخصصین د معاصرو ستونزو لپاره د شریعت په رڼا کې علمي او عملي حل لارې وړاندې کړي.
د ننګرهار پوهنتون رئیس شیخ انعام الله مدني، د امام ابوحنیفه رحمه الله دیني تخصصاتو جامعې رئیس مفتي عبدالوارث بسام، د یادې جامعې د علمي چارو مرستیال مفتي عطاء الله حکيمي، د جامعې د افتاء او قضاء څانګې استاد مفتي شاهدالله حقاني او نورو ویناوالو د فارغانو کورنیو ته مبارکي ورکړه، فارغو فضلاء کرامو ته یې په مختلفو برخو کې لارښوونې او سپارښتنې وکړې او ورته یې وویل، چې د خپل بصیرت، تحقیقي وړتیاوو او مهارتونو پر مټ د افتاء او قضاء په میدان کې د عدالت، اعتدال او علمي استدلال غوره مظاهره وکړي، اسلامي ارزښتونه خپاره او مسلمانانو ته یې لارښوونه وکړي.
هغوی همدارنګه ټینګار په دې وکړ، چې فارغ علماء کرام دې خپل علم د تقوا، اخلاص او خدمت له روحیې سره یو ځای او د ټولنې د اصلاح او عدالت د ټینګښت لپاره دې هڅې وکړي.
غونډه په دعا سره پای ته ورسېده.
