د علمي چارو مرستیال د ژبو او ادبیاتو پوهنځي د استادانو د علمي ترفیعاتو په کنفرانسونو کې ګډون وکړ.
د ننګرهار پوهنتون د علمي چارو مرستیال پوهندوی مولوي احسان الله ناصح د یادو کنفرانسونو د پرانیستې وینا پر مهال مسؤلینو ته سپارښتنه وکړه، چې د استادانو اکاډمیکې لاسته راوړنې او وړتیاوې دې په دقیقه توګه او د علمي ترفیعاتو د اصولو په رڼا کې وارزول شي.
نوموړي همدارنګه ټینګار وکړ، چې د استادانو علمي پرمختګ او ظرفیت لوړونې ته دې جدي پاملرنه وشي او ترفیع کوونکي استادان باید د علمي ترفیع لپاره ټاکل شوي مقررات او تګلارې په پام کې ونیسي.
د یادونې وړ ده، چې د ژبو او ادبیاتو پوهنځي استادانو پوهندوی بریالي عزیزي او پوهندوی سید آقا مسافر پوهنوال علمي رتبې ته د ترفیع په موخه خپل کنفرانسونه وړاندې کړل.
