د ژبو او ادبیاتو پوهنځي انګلیسي ژبې او ادب څانګې ماسترۍ برنامې تدریسي بهیر پیل شو.
د ننګرهار پوهنتون ژبو او ادبیاتو پوهنځي د انګلیسي ژبې او ادب څانګه کې (د انګلیسي تطبیقي ژبپوهنې) ماسترۍ د نوې ایجاد شوې برنامې د تدریسي بهیر پرانیسته وشوه.
په یاده پرانیستغونډه کې د ننګرهار پوهنتون رئیس شیخ انعام الله مدني، د علمي چارو مرستیال پوهندوی مولوي احسان الله ناصح، د محصلانو چارو مرستیال پوهنیار محمد قاسم هاشمي او د څېړنو او علمي مجلو مرستیال پوهندوی دوکتور سعید محمد وقار سربېره د ژبو او ادبیاتو پوهنځي مسؤلینو، استادانو او د یادې برنامې محصلینو برخه لرله.
د ننګرهار پوهنتون د علمي چارو مرستیال او د فوق لیسانس برنامو آمر پوهندوی مولوي احسان الله ناصح په خپلو خبرو کې د یادې برنامې د ایجاد په اهمیت خبرې وکړې او یاده لاسته راوړنه یې د پوهنتون علمي پرمختګ برخه کې مهم ګام وباله.
نوموړي زیاته کړه، چې دا برنامه به استادانو او محصلینو ته د انګلیسي ژبې د مسلکي تدریس او معیاري زده کړې زمینه برابره کړي، چې له مخې به یې د تدریس کیفیت لوړ او د زده کړو اغېزمنتیا زیاته شي.
ښاغلي ناصح استادانو ته سپارښتنه وکړه، چې د برنامې د تدریس کیفیت ته جدي پاملرنه وکړي او محصلینو ته غوره نظري او عملي زده کړې ورکړي.
د ژبو او ادبیاتو پوهنځي رئیس پوهندوی محمد عارف حازم، د پوهنتون د فوق لیسانس برنامو د علمي بورد منشي پوهنوال دوکتور نجیب الله صالح او د انګلیسي ژبې د یادې برنامې مسؤل پوهنمل دوکتور فهیم رحیمي د غونډې نور ویناوال وو، چې د یادې برنامې په ایجاد د خوښۍ څرګندولو تر څنګ یې د غونډې ګډونوالو ته د برنامې په اړه معلومات ورکړل.
د یادونې وړ ده، چې ننګرهار پوهنتون دا مهال د لیسانس او شپې برنامو سربېره د ماسترۍ ۱۰ او د دکتورا ۳ برنامې لري، چې نږدې ۶۰۰ تنه محصلین په کې په زده کړو بوخت دي.
