د ننګرهار پوهنتون ساینس پوهنځي د ودانۍ ترمیماتي چارې په چټکۍ سره روانې دي.
د پوهنځي د مسؤلینو په وینا، د یادو ترمیماتي چارو پر مهال به د پوهنځي ودانۍ، درسي خونو او تشنابونو د تخریب شویو دېوالونو پلستر کاري، د ماتو ښیښو نوي کول، له کاره لوېدلو دروازو او کړکیو جوړول، د مسطح او قلفونو نصبول، برقي سامان آلاتو ترمیم او نور اړین کارونه ترسره شي.
د ساینس پوهنځي رئیس پوهنمل رفیع الله رفیع وايي، یادې ترمیماتي چارې د (۴۱۲۰۰۰) څلور سوه او دولس زره افغانیو په مالي لګښت ترسره کېږي، چې مصرف یې ننګرهار پوهنتون له خپلې داخلي بودیجې څخه ورکوي.
نوموړي په یادو ترمیماتو خوښي وښوده او زیاته یې کړه، چې په دې سره به یو معیاري درسي چاپېریال رامنځ ته او د پوهنځي ودانۍ او درسي خونو ته د بې ځایه غږونو، یخو او ګرمو هواګانو د راننوتلو مخنیوی وشي.
د ننګرهار پوهنتون د اداري او مالي چارو مرستیال مُفتي نعمت الله اعزازي په وینا، په پلان کې لري، چې د پوهنتون د ټولو پوهنځیو ترمیماتي چارې ترسره او د غوره خدمتونو وړاندې کولو په موخه ورته اړین امکانات چمتو کړي.
