بایزید روښان او متانت د لوړو زده کړو مؤسسو ننګرهار پوهنتون سره د ګډو همکاریو تفاهملیکونه لاسلیک کړل.
د مسؤلينو په وينا، د اصولو په چوکاټ کې د پیاوړو علمي اړیکو ایجادول، یو له بل سره د اکاډمیکو مشورو او تجربو شریکول، په علمي، تحقیقاتي او نشراتي برنامو کې په ګډه کار کول، استادانو، اداري کارکوونکو او محصلینو ته د علمي او ظرفیت لوړونې برنامو او علمي سیرونه برابرول او د علمي کادر غړو د تقرر او ترفیعاتو په برخه کې دوه اړخیزه همکاري ددې تفاهملیکونو اساسي موخې دي.
یاد تفاهملیکونه د ننګرهار پوهنتون د رئیس شیخ انعام الله مدني، د بایزید روښان لوړو زده کړو مؤسسې رئیس دوکتور عزیز الدین نجات او د متانت لوړو زده کړو مؤسسې رئیس وفي الله رؤفي تر منځ د ننګرهار پوهنتون په ریاست مقام کې لاسلیک شول.
د یادونې وړ ده، چې د یادو تفاهملیکونو د لاسلیک پر مهال د ننګرهار پوهنتون د علمي چارو مرستیال پوهندوی مولوي احسان الله ناصح او د متانت لوړو زده کړو مؤسسې د علمي چارو مرستیال رشید الله شینواري هم حضور درلود.
